一連七日書展眨眼就過。
呢兩年受疫情影響無得去旅行，對我而言，值得期待嘅就只係剩低呢段日子，可以同一直喺背後支持我嘅你哋見面。
隔咗兩年，變化實在太大。我見到有小學嘅讀者已經成為中學生、中學嘅已經考完Dse、大學嘅已經成為社會人、有本來一個單丁嚟簽嘅讀者今年帶埋另一半﹙所以書要簽兩個名﹚、有情侶今年已經係幸福夫妻。
仲有一啲更深刻嘅對話，有小演員、準備公開運動比賽嘅讀者專登嚟到；有父女、母子檔因為一齊睇我嘅書所以多咗話題；有唔少學生讀者話我嘅書令佢哋中文考好咗﹙汗﹚；有啲，就係準備離開香港前最後見我一面…
係你哋令我深深明白到，原來我嘅書、我嘅文字，真係可以喺無意中影響到咁多人。你哋個個都咁努力，試問我仲點敢怠慢落去？
我會繼續寫，為一直努力緊嘅你哋提供喘息補充能量嘅空間。就好似，你哋為我所做緊嘅嘢一樣。
希望下年再見。
幸運嘅話，我想再早一點。
感謝大家。
p.s. 呢邊壓柞得太勁，想緊貼我消息請 follow 埋 IG : echoofheart
Search